囍 34wk ... 生離死別

今晚同好友食飯 最近同多年男友分手
係由對方提出嘅 有晒計劃結婚 都係咁 好可惜呢
對方係個大好人 不過咁多年卒之忍唔到好友對最親嘅人先有嘅脾氣
成熟地唔係喺鬧交時而係喺和平氣氛下提出 - 我就唔得喇
可憐嘅好友 心痛一個咁好嘅人比佢搞到咁極度唔開心
佢深感係真係要作出改變
身邊多人俾到佢一啲提醒同體會
聰明嘅你 希望無論真命天子係邊個 你都有開心美好嘅未來
當然我哋會喺你身邊

而今日新聞裡那個交通意外去逝嘅後生仔 正是佢依家做嗰度嘅舊同事
女朋友仲喺度做 返返吓工收到個咁嘅電話 個女仔崩潰了...
唔好話佢哋成班舊同事 睇住新聞直播嗰種震憾 嗰種切膚之痛
我唔識嘅 聽到都打冷震 內心更洶湧翻騰
好友話佢更深深體會到
個天唔知幾時會拿走你身邊嘅o野 想唔明咩叫珍惜眼前人都唔得
成日話啲人駕車甚至只係行路要帶眼同負責
有咩事係可以好大鑊架 啲人幾時先小心啲?!?!

呢幾日又有一單都唔知係內地第幾單媒礦意外
死傷者眾一如以往 究竟幾時先有改善???
有地方官員話會徹查 會負責 佢哋會做啲咩!!!
慶幸(?!)新聞話礦工全為正式員工 佢哋會按法賠償
不過喺內地人命唔值錢 佢哋家人又會有幾多??
不過可能政府驚有人上訪而會俾好多囉
願眾人安息 亦保佑好快有天下太平嘅一天

囍 33wk - 33!!!!

好耐冇落雨 今日下雨天 空氣亦冷冷的喲

都好耐冇喪食零食 今日買咗堆零食 哈哈

最近呢個月人仔大咗 成日feel到佢郁

以前返工可能佢未夠大又掛住做 唔多感覺到佢郁o架

不過未見過有隻手或者腳凸出嚟 唔知有冇機會呢

話咁快下個月就放產假啦

以後嘅生命都3人行了 生命又向前移動

囍 32wk - 倒數ing及開始!!!

今早知道妹妹生了 下半年嘅第5個bb出世lu :)
7磅幾 幾好0丫
希望一家開開心心
呢個小b女係我哋屋企第1個下1代呢 榮升舅父舅母我哋好:)
今日你特別活躍 由返工到睇MJ 喺咪都好想出嚟睇吓呢 :)
你家姐出咗世lu next month la~

當你話同公司申請咗3個禮拜假陪我 我已經好開心 好似收到禮物咁
其實喺年尾 無論你最後放唔放到咁多 經已好多謝你 你真好

卒之買咗scanner 可以預備清下我啲雜誌 hehe

今晚同朋友睇咗mj嘅'this is it' 我唔係粉絲
但見到咩真係叫工作認真 佢對自己嘅歌 舞 由頭到尾都咁熟識
要執好每1個細節到滿意
我諗香港最top嗰批歌星點都比唔起 咁佢哋憑乜有惡劣嘅待人態度
淨係睇呢個彩排 已經見到完成版好正 尤其係啲畫面同機關
其中1幕結束時有部推土機上台!!! 幾震撼!!!

好可惜 全世界巨星逐漸消失
要唱得睇得都幾難 仲有埋跳得更加難上加難呢

睇戲前同朋友討論到之前告佢嘅LA差館同佢做死因調查
證明佢真係有白蝕 冇成身針孔 身體健康
唔係世界以為嘅妖魔鬼怪
喺死後可以平反 好過冇
只係覺得全世界嘅狗仔隊一樣咁衰
人真係可怕 由古到今 到處都係人言可畏

諗起最近滅火筒新聞令到個女人毀容
個女人好好 報紙冇話過佢哋要賠償 喺依家係好難得
但係諗吓佢從此毀容
以後世人當佢係怪物 而唔會諗吓點解佢會咁 可怕
希望佢以後可以好好生存

喺mj彩排臨尾 mj同啲工作人員講愛講和平講世界
戲院有人輕笑 我諗啲工作人員都會係咁
而呢個世界唔知點解會當好似佢哋咁成日講呢啲嘅人係傻...
不過我仍然希望呢個世界少啲紛爭 多啲好人好事

伸延閱讀: 高慧然＠蘋果日報 工作中的男人